Summo cum dolore fratrum repentina morte in nosocomio sororum Ordinis S. Benedicti Tutzingae die 24. octobris 1966 e gremio nostro abreptus est

abbas vetusti monasterii ad S. Michaelem in Metten

aetatis suae anno LXXVI

professionis monasticae LV, sacerdotii LI,

dignitatis vero abbatialis XXXVIII.

Natus est Tusae in Bohemia (nunc Taus) die 26. Februarii 1891 patre coriario. Puerum septennem parentibus orbatum soror in Bavaria quaestorio cuidam nupta domo sua recepit. A pastore parochiae, qui probe indolem adulescentuli agnovit, monachis Metamensibus traditus est erudiendus. Studiis literarum egregie absolutis habitum Sancti Benedicti in monasterio nostro petivit et die 16. Novembris 1911 vota prima emisit. Ad philosophiam et theologiam in universitate Oenipontana incubuit et orto repente periculosissimo bello in templo Metamensi St. Michaelis sacerdotio initiatus est. Studiis philologicis et linguisticis in universitate Monacensi magna cum laude perfunctus, anno 1919 cum arma vixdum silerent, ad gradum magistri evectus est. Deinde cum aliquot annos magistri partes in gymnasio nostro egisset necnon curae animarum sedulo se dedisset, ab anno 1924 usque ad annum 1927 in monasterio St. Vincentii (USA) et curae animarum et scholae operam dedit, necnon per Angliam et Galliam iter studiorum causa fecit. Domum reversus felici semper successu recentes linguas docebat, discipulis acceptus propter comitatem, humanitatem, linguarum eximiam facultatem.

Sed cum scholae per 29 annos usque ad extremum vitae terminum operam et curam impenderet, seminarii regimen eodem anno 1929 commutavit cum regimine monasterii. Nam apud confratres et alumnos tantam auctoritatem assecutus est, ut eligeretur abbas. Deinde omni virium contentione disciplinam monasticam amplexus imprimis studuit in opere divino dignitatem et splendorem servare. Vix umquam non aderat in officio peragendo. In missis pontificalibus summa cum diligentia rubricas observabat ad omnium adstantium aedificationem. Neque mirum, quod etiam orationi privatae tempus reservabat, cum esset vir religiosus.

Per quindecim annos administrator monasterii Altahensis inferioris, item per novem annos delegatus apostolicus pro abbatia Pragensi-Brevnoviensi nominatus asperrimis temporibus haec difficillima munera absolvit ab anno 1934 usque ad annum 1949. At constantia eius in carceribus imperii, quod dicitur tertii, cribrata est. Bello demum confecto feliciter ad monasterium regressus animo indefesso scholae restituendae operam navabat.