Pie obdormivit in pace Christi dilectus confrater noster

aetatis suae anno 86., professionis 57., sacerdotii 63. Natus est die 23. 5. 1879 in vico Auerbach (Oberpfalz); sub cura piorum parentium, qui mercatores erant. Ab anno 1890 usque ad annum 1898 gymnasium OSB Metamense visitavit et studia humaniora optime persolvit. Deinde adiit universitatem Monacensem, in qua in philosophiam necnom theologiam incubuit. Anno 1900 Bambergam se contulit in seminarium archiepiscopale ad explenda studia sacrae Theologiae. Die 3. 8. 1902 sacerdotio initiatus usque ad annum 1906 diversis in locis archidioeceseos Bambergensis magno cum zelo animarum munere cooperatoris vel coadiutoris parochialis functus est. Inflammatus vero desiderio vitae monasticae, quam adolescens Metamae noverat, Reverendissimum D. D. Abbatem Willibaldum monasterii Metamensis rogavit, ut in monasterium reciperetur. Cuius in manus emisit vota die 16. 10. 1907. Utpote peritus curae animarum per triginta fere annos in omnibus parochiis abbatiae adscriptis sive cooperator sive parochus operam dedit animis in vita christiana excolendis. Praeterea complures libros vel etiam inquisitiones in ephemeridibus publicatas conscripsit de quaestionibus curae pastoralis ea aetate disputatis: de communione parvulorum ad mentem Sancti Papae Pii X. promovenda, de catechizatione puerorum, de modo, quomodo Christus praedicetur. Magna cum diligentia historiam parochiarum, quas regendas susceperat, inquisivit et plurimas notitias ad earum historiam compilandam congessit.

Tandem cum putaret vires suas non iam sufficere ad munus parochiale, officium confessarii et spiritualis apud sorores OSB Abbatiae Frauenchiemsee, in praedio Mitterndorf degentes, suscepit et ab anno 1936 usque 1947 fideliter explevit. Dein apud sorores Instituti BMV in oppido Plattling usque ad mortem eodem munere functus est, intermissis duobus tantum annis, quibus sororibus Sancti Francisci in vico Feilnbach (Oberbayern) verbum divinum per sacramenta et conciones praebuit. Multi sermones conscripti documento sunt, quanto studio munus suum compleverit. His ultimis annis saepius de morte appropinquante admonitus nihilominus mira quadam agilitate animi omnibus quaestionibus recentissimis quoque se dedit. Affabilis et gratus in conversatione, patiens in morbis usque ad paucos ante mortem dies speravit, se adhuc reversurum esse ad altare et ad officia sibi commissa. Tandem vero mortem animo quieto exspectavit et sanctae ecclesiae sacramentis rite munitus ineunte die 16. mensis Novembris animam piam exspiravit.

zurück zu den Texten zur Mettener Lokalgeschichte

St.-Michaels-Gymnasium Metten metten_gym@degnet.de