Anno 1940 ad militiam evocatus curae aegrotorum et sauciorum militum deputatus est. Quo in opere caritatis ipse in Chersoneso Taurica graviter vulneratus, Theodosiae in nosocomio cubans subita hostium incursione facta mortem obiit pro patria. Eius corpus post oppidi recuperationem inventum militari ritu honorifice ibi sepultum est. Consummatus in brevi explevit tempora multa.

Primus confratrum autumno anni 1939 ad militiam evocatus bello Francogallico intererat atque ob insignem fortitudinem cruce ferrea II. cl. decoratus est. Bello durante sacerdotio initiatus in Russia militans graviter in pulmone percussus est, dum vulnerato commilitoni auxiliare studet, et die 19. Ianuarii 1942 animam efflavit. Carus confrater morum suavitate et animi sublimitate praestans omnium sibi amorem conciliabat atque optimam spem praebebat.

Paulo post belli initum ad militiam vocatus et aeronautarum numero aggregatus est, ut radiotelegraphistae munero fungeretur. Postremo in Italiam missus, cum exercendi causa volatum faceret, una cum aeroplano in mare praecipitatus fluctibus haustus est. Defunctus frater, ut erat pietate sincera imbutus, iam pridem ad omnes belli casus paratus erat, adulescens et morum comitate et sedata animi hilaritate omnibus acceptus.

Natura placidus et modestus tacite et sine ulla ambitione officia sua religiose explebat, et in monasterio et in militia. Curruum ferratorum militibus insertus, postquam in Graecia et in Chersoneso Taurica bello interfuit, graviter in pectore percussus morte absumptus est. Adolescens optimae spei brevi vitae cursum consummavit.

1940 militam evocatus nosocomorum numero aggregatus est. Per nonnullos annos in oppido Kissingen versatus in exercendis tironibus et in colenda arte musica, quam apprime callebat, occupatus erat. Inde in belli orientalem frontem missus ob fortitudinem et interritum animum in optionis gradum promotus et cruce ferrea I et II Cl. decoratus est. Morum facilitate et animi hilaritate necnon artis musicae peritia omnibus sodalibus acceptus erat.

zurück zu den Texten zur Mettener Lokalgeschichte

St.-Michaels-Gymnasium Metten metten_gym@degnet.de